BICHAR GAYE بچھڑ گئے – COL. Z. I. FARRUKH

”بچھڑ گئے“میں مصنف کرنل زیڈ آئی فرخ نے اپنی ستمبر 1970ءسے مارچ 1975ءتک کی پُر آشوب زندگی کی کہانی لکھی ہے، جو چشم دید واقعات، اپنے نوجوانی کے احساسات، بنگالیوں کے جذبات اور ہمارے من حیث القوم اقدامات کے تاریخی تجزیے کا امتزاج ہے۔ مجموعی طور پر یہ کتاب اپنی آئندہ نسل کو تاریخ میں مخفی حالات سے آگاہی اور مستقبل میں ملکی سلامتی کے لیے انفرادی، گروہی اور اجتماعی ذمہ داریاں پہچاننے کے لیے دعوتِ فکرہے۔
مطالعہ پاکستان سے خصوصی رغبت رکھنے والے کیپٹن فرخ، 30 ستمبر 1970ءکو پاک آرمی سے ایسٹ پاکستان رائفلز (EPR)میں ٹرانسفر ہو کر ڈھاکہ پہنچے۔ انہیں ہیڈکوارٹر EPRمیں جنرل سٹاف افسر III انٹیلی جینس تعینات کر دیا گیا۔ EPRتقریباً 90فیصد بنگالی، باقی 10فیصد بہاری اور مغربی پاکستانیوں پر مشتمل تھی۔ چھے سات کے علاوہ سارے افسر مغربی پاکستان سے ہی تھے۔ اس وقت کی مشرق مغرب کشیدگی کا زیر زمین لاوا اس ادارے میں خصوصی جنبش کی استطاعت رکھتا تھا۔ پورے صوبے سے اطلاعات کی وصولی، نقشوں پر مارک کرنا، سینئر افسران کی زیر نگرانی ایکشن کرنا کیپٹن فرخ کے فرائض میں شامل تھا۔ لہٰذا ایک وسیع منظر نامے میں کام کرتے ہوئے انہیں حالات کو بہتر طریقے سے سمجھنے کا موقع ملا۔ انہی فرائض کے دوران انہوں نے بغاوت بنتے دیکھی، فوجی ایکشن میں حصہ لیا، آٹھ ماہ کی خانہ جنگی کے بعد بے سروسامانی کی جنگ لڑی۔ پھر دو سال، چار ماہ، بارہ دن جنگی قیدی رہنے کے بعد وطن عزیز واپس آکر فوج میں کرنل تک کا اعزاز حاصل کیا۔ ریٹائرمنٹ کے بعد دو عشروں سے کالم نگاری اور تجزیہ کاری سے قومی خدمت جاری رکھے ہوئے ہیں۔ کتاب ”انقلابِ پاکستان“ کے بھی مصنف ہیں اور ”مربوط سوسائٹی وقت کی بنیادی ضرورت “ سمجھتے ہوئے معاشرتی بہتری کے لیے عملی طور پر کوشاںہیں۔